ភ្នំពេញ៖ រាជរដ្ឋាភិបាលកម្ពុជាបានចេញអនុក្រឹត្យនាថ្ងៃទី១៧ ខែកុម្ភៈ ឆ្នាំ២០២៣ សម្រេចបន្ថែមប្រាក់របបសន្តិសុខសង្គមប្រចាំខែដល់អតីតមន្ត្រីរាជការស៊ីវិល និងអតីតយុទ្ធជន ដែលត្រូវអនុវត្តចាប់ពីថ្ងៃទី១ ខែមករា ឆ្នាំ២០២៣។
តាមអនុក្រឹត្យរបស់រាជរដ្ឋាភិបាល ក្នុងមាត្រា១ បានបញ្ជាក់ថា អតីតមន្ត្រីរាជការស៊ីវិល និងអតីតយុទ្ធជនដែលទទួលបានរបបសន្តិសុខសង្គមប្រចាំខែបច្ចុប្បន្នចាប់ពី ៦៩០ ០០០រៀល នឹងត្រូវផ្តល់បន្ថែមឱ្យដល់ ៧៧០ ០០០រៀល។
អតីតមន្ត្រីរាជការស៊ីវិល និងអតីតយុទ្ធជនដែលទទួលបានរបបសន្តិសុខសង្គមប្រចាំខែបច្ចុប្បន្នក្នុងចន្លោះចាប់ពី ៧៧០ ០០១ រៀល ដល់ត្រឹម១លានរៀល នឹងត្រូវផ្តល់ជូនបន្ថែមចំនួន ២ម៉ឺនរៀល ក្នុង ១ខែ។
អតីតមន្ត្រីរាជការស៊ីវិល និងអតីតយុទ្ធជនដែលទទួលបានរបបសន្តិសុខសង្គមប្រចាំខែបច្ចុប្បន្នចាប់ពី ១ ០០០ ០០១រៀល ដល់ត្រឹម ១ ០១០ ០០០រៀលនឹងត្រូវបន្ថែមឱ្យដល់ត្រឹម ១ ០២០ ០០០រៀល ក្នុង១ខែ។
ចំពោះអតីតមន្ត្រីរាជការស៊ីវិល និងអតីតយុទ្ធជនដែលទទួលបានរបបសន្តិសុខសង្គមប្រចាំខែបច្ចុប្បន្នចាប់ពី ១ ០១០ ០០១រៀលឡើងទៅ ត្រូវផ្ដល់ជូនបន្ថែមចំនួន ១ម៉ឺនរៀល ក្នុង១ខែ។
ក្នុងមាត្រា១ ដដែលនៃអនុក្រឹត្យបានបញ្ជាក់ថា អតីតមន្ត្រីរាជការស៊ីវិល និង អតីតយុទ្ធជន ដែលទទួលបានការបន្ថែមរបបសន្តិសុខសង្គមប្រចាំខែខាងលើ គឺពុំអាចទទួលបានកម្រិតផ្សេងទៀតឡើយ៕
